អាមេរិក៖ ប្រធានាធិបតីសហរដ្ឋអាមេរិកលោក ចូ បៃដិន បានបង្ហាញអារម្មណ៍សោកស្ដាយចំពោះមរណភាពរបស់លោក ស៊ិនហ្ស៊ូ អាបេ ដោយសារការអំពើឃាតកម្មកាលពីព្រឹកថ្ងៃសុក្រ ទី៨ ខែកក្កដានេះ។

លោកបៃឌិន បានសរសេរលើហ្វេសបុកផេករបស់លោកថា៖ «ខ្ញុំស្រឡាំងកាំង ខឹងសម្បារ និងសោកស្ដាយជាខ្លាំងចំពោះព័ត៌មានដែលថា មិត្តរបស់ខ្ញុំ Abe Shinzo អតីតនាយករដ្ឋមន្ត្រីជប៉ុន ត្រូវបានបាញ់សម្លាប់។ គាត់គឺជាជើងឯកនៃមិត្តភាពរវាងប្រជាជនរបស់យើង។ អាមេរិក ឈរ ជាមួយ ជប៉ុន ក្នុង គ្រា ដ៏ សោកសៅ នេះ»។

ជាមួយគ្នានេះអតីតប្រធានាធិបតីអាមេរិកលោក ប៉ារ៉ាក់ អូបាម៉ា ក៏បានបង្ហាញនូវអារម្មណ៍សោកស្ដាយចំពោះមរណភាពរបស់លោក ស៊ិនហ្ស៊ូ អាបេ ផងដែរដោយលោកថាលោកនឹងចងចាំនូវការងារដែលលោកនិងលោកអាបេ បានធ្វើដើម្បីពង្រឹងសម្ព័ន្ធភាព។

លោក អូបាម៉ា សរសេរថា៖ «ខ្ញុំមានការភ្ញាក់ផ្អើល និងសោកស្ដាយចំពោះការធ្វើឃាតរបស់មិត្តភ័ក្តិ និងដៃគូយូរឆ្នាំ Shinzo Abe នៅប្រទេសជប៉ុន។ អតីតនាយករដ្ឋមន្រ្ដី អាបេ បានលះបង់ចំពោះប្រទេសដែលលោកបម្រើការ និងសម្ព័ន្ធភាពមិនធម្មតារវាងសហរដ្ឋអាមេរិក និងជប៉ុន។ ខ្ញុំនឹងចងចាំជានិច្ចនូវការងារដែលយើងបានធ្វើដើម្បីពង្រឹងសម្ព័ន្ធភាពរបស់យើង បទពិសោធន៍ផ្លាស់ប្តូរនៃការធ្វើដំណើរទៅកាន់ទីក្រុង Hiroshima និង Pearl Harbor ជាមួយគ្នា និងព្រះគុណដែលគាត់ និងភរិយារបស់គាត់ Akie Abe បានបង្ហាញដល់ខ្ញុំ និង Michelle ។ Michelle និងខ្ញុំសូមចូលរួមរំលែកទុក្ខដ៏ក្រៀមក្រំបំផុតរបស់យើងទៅកាន់ប្រជាជននៃប្រទេសជប៉ុនដែលមានការគិតរបស់យើងយ៉ាងខ្លាំងក្នុងគ្រាដ៏ឈឺចាប់នេះ»។

លោក ស៊ីនហ្សូ អាបេ គឺជាអតីតនាយករដ្ឋមន្ត្រីដែលកាន់តំណែងយូរមួយនៅប្រទេសជប៉ុន។ លោកត្រូវបានខ្មាន់កាំភ្លើងបាញ់សម្លាប់ក្នុងពេលលោកថ្លែងសុន្ទរកថាមួយកាលពីព្រឹកមិញសម្រាប់យុទ្ធនាការឃោសនាបោះឆ្នោតសភាជាន់ខ្ពស់ជប៉ុននៅភាគខាងលិចទីក្រុង Nara ប្រទេសជប៉ុន។

នៅកន្លែងបាញ់សម្លាប់លោកឯណោះវិញ ពលរដ្ឋជប៉ុនបាននាំគ្នាទៅដាក់កម្រងផ្កា ដុតទៀន ជាការរម្លឹកចំពោះការបាត់បង់លោក អាបេ ផងដែរ៕